平时食开 满记 嘅中式甜品，估唔到今次佢哋搞新意，建立另一个旗下品牌 Sweetish by HONEYMOON DESSERT。餐厅走简约北欧风，配上原木色调，感觉好Chill。其主打「魔鬼V.S.天使」路线，将你意想不到嘅嘢食结合一齐！就好似 榴槤 芝士 薄饼，真係好难想像味道係点！

 

魔鬼榴槤配芝士

又到咗食果王嘅日子，榴槤爱好者今次有新尝试！Sweetish by HONEYMOON DESSERT 推出嘅一系列薄饼甜品中，最注目嘅当然係榴槤芝士薄饼。先将清甜嘅金枕头混合起士以及忌廉芝士酱，再厚厚擦上3mm特薄饼底上，并洒上Mozzarella Cheese。

焗完之后已经可以见到表面嘅芝士完全融化，而且闻到浓浓榴槤味，拎上手即刻可以拉丝。浓浓嘅馅料配香脆饼底，可以中和返饱滞感，但都係好邪恶！

幸福感UP！草莓棉花糖组合好梦幻

如果想拣返啲适合大众口味嘅薄饼，可以选择草莓棉花糖薄饼。喺饼底到擦上Nutella再铺上棉花糖，焗完之后棉花糖已同Nutella完美结合，此时再唧忌廉同放上草莓于顶，最后加入朱古力酱。又冷又热加上棉花糖嘅烟韧，口感丰富，相信会吸引不少女士同小朋友！

浪漫唯美玫瑰花蛋糕

呢款Rose Angel如其名，表面擦满忌廉，加上一块块经封乾再加糖嘅玫瑰花瓣，由卖相所看已经靓到唔捨得食！切开蛋糕，入面有两层海棉蛋糕夹住玫瑰花酱，清新可口！妈咪或者女朋友生日绝对可以买返个凼下佢哋。

Sweetish by HONEYMOON DESSERT

地址：元朗朗日路8-9号及元龙街9号YOHO MALL 2 期 3 楼 A315B 舖

营业时间：11am-11pm

电话：2791 7388

Facebook：Sweetish by HONEYMOON DESSERT